सुनाखरी न्युज/ काठमाडौं ।
नेपाली कांग्रेसले संसदीय दल नेता चयन गर्न निर्वाचन प्रक्रिया केही दिनभित्रै सुरू गर्ने तयारी गरेको छ।

केन्द्रीय कार्यसम्पादन समिति बैठक बस्ने र त्यसले निर्वाचन समिति बनाएपछि संसदीय दल नेता चयन प्रक्रिया अघि बढ्ने महामन्त्री गुरूराज घिमिरेले जानकारी दिए।

प्रतिनिधि सभामा ३८ सिट रहेको कांग्रेस प्रमुख प्रतिपक्षी दल हो। सरकारको सिफारिसमा राष्ट्रपति रामचन्द्र पौडेलले भोलि बिहीबार बस्ने गरी संघीय संसदको दुवै सदनको अधिवेशन आह्वान गरेका छन्।

प्रतिनिधि सभाको पहिलो बैठक बस्ने बेला हुँदासम्म कांग्रेसले संसदीय दल नेता चयन गरेको छैन।

प्रतिनिधि सभामा कांग्रेस सांसद अर्जुननरसिंह केसी ज्येष्ठ सदस्य छन्। सभामुख चयन नहुँदासम्म ज्येष्ठ सदस्यले प्रतिनिधि सभा बैठक सञ्चालन गर्नेछन्। पहिलो बैठक बसेको १५ दिनभित्र सभामुख चयन हुनेछ।

ज्येष्ठ सदस्य अर्जुननरसिंह केसी पनि कांग्रेस संसदीय दल नेता हुने चर्चा पार्टीभित्र छ। उनी समानुपातिकतर्फबाट सांसद भएका थिए।