सुनाखरी न्युज/ काठमाडौं ।

काठमाडौं उपत्यका अपराध अनुसन्धान कार्यालयका एसएसपी सन्तोष खड्काले थप अनुसन्धान तथा कारबाहीका लागि सुनसहित पक्राउ परेका तीन चिनियाँलाई त्रिभुवन अन्तराष्ट्रिय विमानस्थल भन्सार कार्यालय पठाइएको बताए ।

काठमाडौं उपत्यका अपराध अनुसन्धान कार्यालयले गत २२ असोजमा बूढानीलकण्ठ नगरपालिका–माथिल्लो भंगालस्थित एक घरबाट उक्त सुन बरामद गरेको थियो। बरामद सुनको मूल्य त्यस दिनको बजार भाउअनुसार ५४ करोड ६० लाख ७ हजार ३२० रुपैयाँ रहेको थियो।

प्रहरीले घरबाट सुनका टुक्रा, बिस्कुट आकारका ढिक्का तथा लेसिलो अवस्थामा रहेको सुन फेला पारेको थियो। घटनामा संलग्न रहेको आरोपमा चीनको जियाङ्सु र ग्वाङडोङ क्षेत्रका २७ वर्षीय हान फिई, ४७ वर्षीय चोउ लङसिन र ३७ वर्षीय वाङ जियान्जेन पक्राउ परेका छन्।

सुन कसरी नेपाल भित्र्याइयो भन्नेबारे प्रहरीले थप अनुसन्धान जारी राखेको छ । सुनलाई लेदोका रूपमा त्रिभुवन अन्तर्राष्ट्रिय विमानस्थलबाट नै नेपाल छिराइएको प्रहरीको प्रारम्भिक आशंका छ ।