सुनाखरी न्युज/ काठमाडौं ।

धेरै मानिस बसिरहेका बेला अनायासै औँलाका जोर्नी पड्काउने गर्छन्। औँला पड्काउँदा आउने आवाजले कतिपयलाई छुट्टै आनन्द वा सन्तुष्टि पनि मिल्छ। डोनाल्ड उङ्गर हुर्कंदै गर्दा उनकी आमा, काकीहरू र पछि सासूले लगातार औँला पड्काउँदा बाथ रोग लाग्छ भनी चेतावनी दिएका थिए।

उनीहरूको भनाइलाई गलत साबित गर्ने अठोटका साथ डोनाल्डले ५० वर्षसम्म दिनमा कम्तीमा दुई पटक आफ्नो देब्रे हातका औँला पड्काए ।  यसरी उनले जम्मा करिब ३६,५०० पटक औँला पड्काए। दाहिने हात भने उनले जस्ताको तस्तै छाडे। सन् १९९८ मा ७२ वर्षको उमेरमा, आफ्नो जीवनभरिको प्रयासको नतिजा जान्न उनले दुवै हातको एक्स – रे गरे। उनले निष्कर्ष निकाले, ‘दुवै हातमा बाथ रोग थिएन र दुवै हातमा कुनै स्पष्ट भिन्नता पनि देखिएन।’

निस्सन्देह, यो केवल एक जनामा गरिएको परीक्षण थियो। अध्ययनहरूका अनुसार २० देखि ५० प्रतिशत मानिसहरू औँला पड्काउँछन्। त्यसोभए, के यो चिन्ता गर्नुपर्ने विषय होरु के औँला पड्काउँदा आउने हरेक आवाजले दीर्घकालीन क्षति पुर्‍याइरहेको हुन्छ त ?

के औँला पड्काउँदा आर्थराइटिस हुन्छ : – 

औँला पड्काउने मानिसको सबैभन्दा ठूलो चिन्ता यही हुन्छ—कतै यसले अस्थिसन्धिशोथ अर्थात् अस्टियोआर्थराइटिस त हुँदैन  ?

अस्टियोआर्थराइटिस आर्थराइटिसको सबैभन्दा सामान्य प्रकार हो। यसमा जोर्नीमा रहेका हड्डीलाई सुरक्षा दिने कार्टिलेज क्रमशः घिसिँदै जान्छ।

तर अध्ययनहरूले औँला पड्काउने र अस्टियोआर्थराइटिसबीच कुनै प्रत्यक्ष सम्बन्ध नरहेको देखाएका छन्।

सन् १९७५ मा प्रकाशित एउटा अध्ययनमा वृद्धाश्रममा रहेका २८ जनाको अध्ययन गरिएको थियो। नियमित रूपमा औँला पड्काउने र औँला नपड्काउने व्यक्तिमा क्षयजन्य आर्थराइटिसको दर समान देखिएको थियो।

त्यस्तै, अर्को अध्ययनमा अस्टियोआर्थराइटिस भएका २१५ जना मानिसको औँला पड्काउने इतिहासलाई यो रोग नभएका मानिससँग तुलना गरिएको थियो। त्यसबाट पनि औँला पड्काउने बानी र अस्टियोआर्थराइटिसबीच कुनै सम्बन्ध नरहेको निष्कर्ष निस्कियो।

औँला पड्काउने बानी कसरी रोक्ने  : –

औँला पड्काउनु सामान्यतया हानिकारक नहुने भएकाले यसलाई रोक्नैपर्ने कुनै विशेष चिकित्सकीय कारण छैन।

तर कसैले आफ्नो बानी रोक्न चाहन्छ भने न्युरोसर्जन जगन्नाथनले संज्ञानात्मक उपचारजस्ता प्रविधि प्रयोग गर्न सुझाव दिएका छन्।

सबैभन्दा पहिले आफूले कुन अवस्थामा र किन औँला पड्काउँछु भन्ने पहिचान गर्न सकिन्छ।

त्यसपछि त्यस्ता परिस्थितिमा हातलाई स्ट्रेस बल वा फिड्जेट खेलौनाजस्ता वस्तुमा व्यस्त राख्न सकिन्छ।