सुनाखरी न्युज/ काठमाडौं ।

७७ औँ अन्तर्राष्ट्रिय मानव अधिकार दिवस (डिसेम्बर १०) का अवसरमा मानव अधिकार तथा शान्ति समाजले २०८२ मंसिर २४ गते झण्डै दुई दर्जन जिल्लामा “भाद्र २३ को दमन/हत्या र २४ को ध्वंसका जिम्मेवारहरुलाई कारवाही गर” विषयक नागरिक संबाद कार्यक्रममा सम्पन्न गरेको छ । समाजद्वारा काठमाडौंमा आयोजित कार्यक्रममा बोल्दै समाजका संस्थापक सभापति कृष्ण पहाडीले शिघ्र निर्वाचन आवश्यक भएको तर सरकारी उदासिनता र केहि दलको भ्रष्ट मोहका कारण निर्वाचन अनिश्चित हुँदै गएकोप्रति चिन्ता व्यक्त गर्नु भएको छ । जेन्जी आन्दोलनको मर्म र नागरिक म्याण्डेट अनुरुप भ्रष्ट शिर्ष नेताहरुलाई कारवाही गर्नु पर्नेमा एकातिर सरकार उदासिन देखिएको र अर्कोतिर केहि दलले जस्को बिरुद्ध नागरिक विद्रोह भयो तीन कै नेतृत्वलाई निरन्तरता दिएर भ्रष्ट मोह प्रदर्शन गरेका कारण नागरिक आक्रोस पुन बढ्न थालेकोतर्फ नागरिक अगुवा पहाडीले ध्यानाकर्षण गराउनुभयो ।

भाद्र २३ को दमन/हत्या र २४ को ध्वंसका जिम्मेवारहरुलाई कारवाही गरी दण्डहीनताको अन्त्य गर्नुपर्नेमा पहाडीले जोड दिनु भयो । समाजका सभापति रेनुका पौडेलको सभापतित्वमा सम्पन्न कार्यक्रममा नागरिक अगुवाहरु अर्जुन पराजुली, विजयकान्त कर्ण, कृष्ण कँडेल, लेखक पत्रकारहरु श्रीकृष्ण अनिरुद्र गौतम, लक्ष्मीधर गुरागाई लगायतले सुशासन लोकतन्त्रको मेरुदण्ड भएको हुँदा सुशासन कायम हुनुपर्ने तर लोकतन्त्रको विकल्प खोज्नु नहुने स्मरण गराउनु भयो । यसैगरी जेन्जी अगुवाहरु माजिद अन्सारी, मनिष खनाल र उमंग लोहनीले सुशासन र स्वतन्त्रताका लागि भएको जेन्जी आन्दोलनको विभिन्न आयामहरुबारे चर्चा गर्नुभएको थियो । समाजले तयार गरेको अवधारणा पत्र बाग्मती प्रदेश सचिव दिवाकर पुडासैनिले र स्वागत काठमाडौं शाखा सभापति बिकास थापाले गर्नु भएको थियो ।