सुनाखरी न्युज/ काठमाडौं ।

एक भारतीय सञ्चारमाध्यमका अनुसार भारत सरकारले नेपालका राजतन्त्रवादी व्यवसायी दुर्गा प्रसाईंको राजनीतिक अभियानप्रति आफ्नो कुनै चासो र सम्बन्ध नभएको बताएको छ। । यो उनको पछिल्लो केही हप्तामा दोस्रो भारत भ्रमण थियो। सो पश्चात् भारत सरकारले आफू प्रसाईंको राजनीतिक अभियानबाट दृढतापूर्वक टाढा राखेको स्पष्ट पारेको हो।

भारतीय सञ्चारमाध्यम एनडीटीभीमा प्रकाशित समाचारका अनुसार प्रसाईंले आफ्नो भ्रमणलाई नेपालको राजतन्त्र र हिन्दू राज्य पुनर्स्थापित गर्ने अभियानको लागि भारतीय नेताहरूसँग सम्पर्क गर्ने र नैतिक समर्थन प्राप्त गर्ने प्रयास को रूपमा सार्वजनिक रूपमा चित्रण गरेका थिए।क्यान्सरको उपचारसँग सम्बन्धित मेडिकल फलोअपका लागि यसै हप्ता दिल्ली पुगेका प्रसाईंले आफ्नो भारत भ्रमणलाई नेपालमा राजसंस्था र हिन्दु राष्ट्र पुनर्स्थापनाको अभियानका लागि ‘नैतिक समर्थन जुटाउने प्रयास’ को रूपमा सार्वजनिक रूपमा चित्रण गर्दै आएका थिए।

तर, भारतीय अधिकारीहरूले भने दिल्लीको उनको गतिविधिमा कुनै चासो वा संलग्नता नरहेकोमा जोड दिएका छन्। भारतले नेपालको निर्वाचित सरकारसँगको स्थिर सम्बन्धलाई प्राथमिकता दिँदै आन्तरिक मामिलामा हस्तक्षेप गरेको कुनै पनि धारणाबाट जोगिन चाहेको कूटनीतिक र सुरक्षा स्रोतहरूले बताएका छन्।यस विषयका जानकार एक अधिकारीले एनडीटीभीसँग भनेका छन्, ‘भारतीय अधिकारीहरूले दुर्गा प्रसाईंलाई भारतमा रहँदा राजनीतिक गतिविधि नगर्न र भारतीय समर्थनको भ्रामक दाबी नगर्न चेतावनी दिएका छन्।’

दिल्लीका अधिकारीहरू प्रसाईंले गरेको भारतीय सहानुभूतिको दाबीबाट चिढिएको भनेर उक्त पत्रिकाले लेखेको छ। ‘प्रसाईंको राजनीतिसँग भारतको प्रत्यक्ष वा अप्रत्यक्ष कुनै सम्बन्ध छैन’, नेपालसँग कूटनीतिक सम्बन्धमा संलग्न एक वरिष्ठ अधिकारीले भने, ‘ उनका गतिविधिलाई भारतबाट कुनै समर्थन छैन।’ ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’का संयोजक प्रसाईंले आगामी मंसिर ७ गतेदेखि आन्दोलन गर्ने घोषणा गरेका छन्।