सुनाखरी न्युज/ काठमाडौं ।
बढ्दो महँगी र आर्थिक असमानताविरुद्ध फ्रान्समा  शनिबार देशभर लाखौँ मानिस सडकमा उत्रिएका छन्।

अधिकांश स्थानमा प्रदर्शन शान्तिपूर्ण रहे पनि साँझ पर्दै जाँदा राजधानी पेरिस, दोस्रो ठूलो सहर मार्सेलीसहित विभिन्न सहरमा प्रदर्शनकारी र प्रहरीबीच झडप भएको छ।

फ्रान्सको गृह मन्त्रालयका अनुसार देशभरका प्रदर्शनमा ४ लाख १० हजार मानिसहरू सहभागी भएका थिए। तर मजदुर युनियनहरूले प्रदर्शनमा सहभागी हुनेको संख्या मन्त्रालयले सार्वजनिक गरेको भन्दा दोब्बर रहेको दाबी गरेका छन्।

पेरिसको दक्षिणपूर्वी क्षेत्रमा भएको मुख्य प्रदर्शनमा मात्रै कम्तीमा एक लाख १० हजार मानिस सहभागी भएको अन्तर्राष्ट्रिय समाचार संस्था रोयटर्सले जनाएको छ।

उनीहरूले बढ्दो जीवनयापन खर्च र समाजमा गहिरिँदै गएको आर्थिक असमानताविरुद्ध नाराबाजी गरेका थिए।

प्रदर्शन सकिएपछि भने अवस्था तनावपूर्ण बनेको थियो।