सुनाखरी न्युज/ काठमाडौं ।

मलेसिया जाने कामदारको बायोमेट्रिक गर्ने संस्थाका सञ्चालक कैलाश खड्कालाई प्रहरीको केन्द्रीय अनुसन्धान ब्युरोले पक्राउ गरेको छ । प्रहरीको केन्द्रीय अनुसन्धान ब्युरो  ( सीआईबी )  ले खड्कालाई बिहीबार ललितपुरबाट पक्राउ गरेको हो । उनी मलेसिया जाने कामदारको बायोमेट्रिक गर्ने संस्थाका सञ्चालक हुन् ।

मलेसियामा रोजगारीमा जाने कामदारहरूलाई आर्थिक भार थप्नेगरी बढी पैसा लिएर ‘सिण्डीकेट’ चलाएको आरोपमा ब्युरोले उनीमाथि अनुसन्धान गरिरहेको थियो । सीआईबीका एक अधिकारीका अनुसार मलेसियामा रोजगारीका लागि जाने कामदारमाथि अतिरिक्त आर्थिक भार पर्ने गरी रकम असुलिएको विषयमा खड्कामाथि अनुसन्धान भइरहेको थियो ।

खड्काको समूहले तोकेको स्वास्थ्य संस्थाबाट मात्रै कामदारको स्वास्थ्य परीक्षण गराउने गरिएको आरोप छ । उनी स्वास्थ्य व्यवसायी सङ्घका अध्यक्ष तथा वैदेशिक रोजगार बोर्डका सदस्यसमेत हुन् ।यसअघि पनि मलेसिया जाने कामदारसँग सम्बन्धित भिएलएन, वान स्टप सेन्टर र जिएसजीजस्ता संयन्त्रमाथि कारबाही प्रक्रिया अघि बढाइएको थियो ।