सुनाखरी न्युज/ काठमाडौं । 

भर्खरै रिहा भएका दुई भूटानी राजनीतिक बन्दीलाई आर्थिक सहयोग हस्तान्तरण बेलडाँगी, नेपाल – भूटानमा राजनीतिक बन्दीहरूको रिहाइका लागि विश्वव्यापी अभियान    जीसीआरपीपीबी  को कोष सङ्कलन अभियानमार्फत सङ्कलित आर्थिक सहायता भर्खरै रिहा भएका पूर्व भूटानी राजनीतिक बन्दीहरू चतुरमान तामाङ र हस्तबहादुर राईलाई पूर्वी नेपालस्थित बेलडाँगी शरणार्थी शिविरमा आयोजित एक समारोहका बीच हस्तान्तरण गरिएको छ।

जुलाई २०२६ मा सञ्चालित कोष सङ्कलन अभियानमा ३३ जना दाताहरूबाट १,४९२ युरो सङ्कलन भएको थियो। गोफन्डमी शुल्क ५१. ८० युरो र ट्रान्सफर शुल्क २० युरो कट्टा गरेपछि १,४२०. २० युरो बाँकी रहेको थियो। कुल नेपाली रुपैयाँ २,४३,८०९. ५७ प्राप्त भएको र सो रकम दुवै जनालाई बराबर बाँडिएको थियो। प्रत्येकले नेपाली रुपैयाँ १,२१,९०४. ७९ प्राप्त गरे। समुदायका सदस्य तथा शुभचिन्तकहरूको उपस्थितिमा आयोजित समारोहमा बेलडाँगी शिविरका सचिव सञ्चहाङ सुब्बाले सो आर्थिक सहायता हस्तान्तरण गरे ।

शिविरका पूर्व सचिव तथा शिविर नेता डिबी सुब्बा र शिविरका अधिकारी कविराज मोङ्गरले तामाङ र राईलाई खदा ओढाएर स्वागत गरेका थिए। यो परम्परागत सम्मानले वर्षौँको जेल जीवनपछि उनीहरूको समुदायमा पुनरागमनलाई सम्मान र सद्भावका साथ चित्रित गर्दछ।तामाङ १७ फेब्रुअरी २००८ र राई १८ फेब्रुअरी २००८ मा भुटानमा गिरफ्तार गरिएका थिए । भुटानमा १८ वर्षभन्दा बढी जेल जीवन बिताएपछि १ जुन २०२६ मा रिहा नहुञ्जेलसम्म दुवै जनालाई चामगाङ केन्द्रीय कारागारमा राखिएको थियो।

रिहाइपछि दुवै जना अत्यन्तै सीमित स्रोतसाधनका साथ बेलडाँगी फर्किएका छन् र अब उनीहरूका अगाडि जीवन पुनर्निर्माण गर्ने कठिन चुनौती छ। यो आर्थिक सहायताले उनीहरूलाई शिविरमा पुनः स्थापित हुँदै गर्दा तत्कालका आवश्यकताहरू पूरा गर्न मद्दत पुर्याउनेछ।शिविर सचिव सञ्चहाङ सुब्बाले दाताहरूलाई सहयोगका लागि धन्यवाद दिए र तामाङ तथा राईलाई आधारभूत आवश्यकताहरू पूरा गर्न र बेलडाँगीमा स्थिर जीवन निर्माण गर्न निरन्तर सहयोगको लागि अपिल गरे ।

उक्त समारोहमा भूटानी शरणार्थी समुदायका वरिष्ठ सदस्यहरू राम प्रधान, कविराज मोङ्गर, रामबहादुर राई, कृष्णवीर तामाङका साथै अन्य शुभचिन्तकहरूको उपस्थिति रहेको थियो। कार्यक्रम सञ्चालन गर्दै  GCRPPB क्याम्प संयोजक तथा पूर्व राजनीतिक बन्दी दिलकुमार राईले ३३ जना दाताहरू र कोष सङ्कलन अभियान तथा यसको सफल हस्तान्तरणमा योगदान पुर्याउने सबैलाई धन्यवाद दिए । तामाङ र राईले पनि दाता तथा समर्थकहरूलाई धन्यवाद दिए ।

उनीहरूले यो सहयोगले जीवनको नयाँ सुरुवात गर्दा हौसला मिलेको बताउंदै शिविरमा सुरक्षित तथा आत्मनिर्भर जीवनतर्फ अघि बढ्दै गर्दा यस्तै ऐक्यबद्धता र सहयोग निरन्तर प्राप्त भै रहने रहने आशा पनि व्यक्त गरे । लगभग दुई दशकको हिरासतपछि सामुदायिक जीवनमा फर्किएका दुई पूर्व राजनीतिक बन्दीहरूका लागि यो हस्तान्तरणले एक महत्त्वपूर्ण नयाँ सुरुवातको सङ्केत गरेको छ। भूटानी राजनीतिक बन्दीहरूको रिहाइका लागि अभियान चलाउन सन् २०१९ मा गठन भएको   GCRPPB ले अझै पनि जेलमा रहेकाहरूलाई सुरक्षित र छिटो रिहाइका लागि निरन्तर आवाज उठाउँदै आएको छ।