सुनाखरी न्युज /  काठमाडौं ।

फिफा विश्वकप २०२६ अन्तर्गत अन्तिम–३२ मा जापान र ब्राजिलबीच हुने बहुप्रतीक्षित खेलअघि टिकटको पुनःबिक्री  (Resale)  बजारमा मूल्य आकाशिएको छ।  ब्राजिलको LeoDias Portal का अनुसार नकआउट चरणमा जापान र ब्राजिलको भेट पक्का हुनेबित्तिकै टिकटको माग एकाएक बढेको हो।

अमेरिकाका प्रमुख रिसेल प्लेटफर्महरूमा मैदानको नवौं पङ्क्तिका प्रिमियम सिटको मूल्य ३२ लाख येन  ( करिब ३० लाख नेपाली रुपैयाँ )  भन्दा माथि पुगेको छ। त्यस्तै, सबैभन्दा सस्ता टिकटसमेत करिब २ लाख ८० हजार येन ( झण्डै २ लाख ६० हजार नेपाली रुपैयाँ )  बाट बिक्री भइरहेको बताइएको छ। समूह चरणमा अपेक्षाकृत कम देखिएको दर्शक उपस्थिति नकआउट चरण सुरु भएसँगै उल्लेखनीय रूपमा बढेको छ।

जापान र ब्राजिलबीचको यो बहुप्रतीक्षित खेल मंगलबार जापानी समयअनुसार बिहान २ : ०० बजे अमेरिकाको ह्युस्टनस्थित एनआरजी स्टेडियममा हुनेछ। पाँच पटकको विश्वकप विजेता ब्राजिल र एसियाली शक्तिका रूपमा उदाएको जापानबीचको यस खेललाई विश्वकपकै सबैभन्दा रोमाञ्चक भिडन्तमध्ये एक मानिएकाले टिकटको मागले नयाँ रेकर्ड नै बनाएको अन्तर्राष्ट्रिय सञ्चारमाध्यमहरूले जनाएका छन्।रासस