सुनाखरी न्युज/ काठमाडौं ।

टर्किस एयरलाइन्सको  टर्कीको इस्तानबुलबाट काठमाडौं आएको जहाज अवतरण गर्ने क्रममा प्राविधिक समस्या उत्पन्न हुँदा ‘ओभरसुट’ गरी बंगलादेशको ढाका गएको छ ।

त्रिभुवन अन्तर्राष्ट्रिय विमानस्थल नागरिक उड्डयन कार्यालयका अनुसार टर्किसको उडान नम्बर टीके ७२६ जहाजमा अवतरण गर्ने क्रममा प्राविधिक समस्या आउँदा लगत्तै ओभरसुट गरेको थियो ।

टर्किसको उक्त जहाज केही बेरअघि ढाकामा सुरक्षित अवतरण गरिसकेको छ ।

‘विमानस्थलका कारण नभई टर्किसको जहाजमै प्राविधिक समस्या आएको थियो,’ विमानस्थलका एक अधिकारीले भने, ‘जहाजको चालकदलले यहीँ अवतरण नगर्ने बरु बंगलादेशको ढाका डाइभर्ट गर्ने भनेपछि उतै गयो ।’

टर्किसको ए३३० सिरिजको उक्त वाइड बडी जहाज बुधबार बिहान ११:१० बजे त्रिभुवन विमानस्थल अवतरण गर्ने तालिका थियो । जहाज १०:५६ बजे विमानस्थल आइपुग्ने अनुमानित समय थियो ।