सुनाखरी न्युज/ काठमाडौं ।

काठमाडौँमा डेंगु सङ्क्रमणका कारण काठमाडौँमा एक युवतीको मृत्यु भएको छ । डेंगु सङ्क्रमण कारण २४ वर्षीय युवतीको बुधबार शुक्रराज ट्रपिकल तथा सरुवा रोग अस्पतालमा मृत्यु भएको उक्त अस्पतालका प्रमुख कन्सल्टेण्ट जनरल फिजिसियन ‌डा .  विमल शर्मा चालिसेले नेपालपत्रलाई जानकारी दिए ।

डेंगु संक्रमित उनी मंगलबार बेलुका अस्पतालमा भर्ना भएकी थिइन् । अस्पताल स्रोतका अनुसार अस्पताल आउँदा नै उनको अवस्था जटिल थियो । यस वर्ष डेंगुबाट मृत्यु भएको यो पहिलो केश हो ।

यस वर्ष हालसम्म २ हजार ९५२ जनामा डेंगु संक्रमण पुष्टि भएको छ । डेंगु ७४ जिल्लामा फैलिएको छ भने गत एक हप्तामात्र १८० नयाँ संक्रमित थपिएका छन् ।

इपिडिमियोलोजी तथा रोग नियन्त्रण महाशाखा ( ईडीसीडी )  को पछिल्लो तथ्यांक अनुसार बागमती प्रदेशमा २९८, कोशीमा ४७, गण्डकीमा २७, सुदूरपश्चिममा २४, लुम्बिनीमा २२, मधेशमा १८ र कर्णालीमा ६ जनामा डेंगु संक्रमण पुष्टि भएको छ ।