२०७८ श्रावण १३ , बुधवार

चोरीका गाडी र नक्कली ‘ब्लु बुक’ बनाएर बेच्ने गिरोह पक्राउ

Capture

सुनाखरी न्युज/ काठमाडौं -नेपाल प्रहरीले चोरीका गाडी र नक्कली ‘ब्लु बुक’ बनाएर बेच्ने गिरोहलाई पक्राउ गरेको छ । भारतबाट गाडी चोरी गरी नेपाल भित्र्याउने र नक्कली कागजात ‘ब्लु बुक’ बनाएर बेच्ने गिरोहलाई महानगरीय अपराध महाशाखाले पत्रकार सम्मेलन गरेर सार्वजनिक गरेको हो ।

 

भन्सार छली चोरी पैठारी गरी काठमाडौँमा गाडी ल्याई नक्कली सवारी दर्ता किताबलगायतका कागजातहरु तयार गरी कारोबार हुने गरेको सूचनाको आधारमा प्रहरीले दुईवटा हुन्डाइको क्रेटा गाडी नियन्त्रणमा लिएको जनाएको छ । उक्त गाडी प्रयोग गर्ने व्यक्तिबाट अनुसन्धान गर्दै जाँदा ब्लु बुक बनाउनेलाई पनि पक्राउ गरिएको महाशाखाका एसएसपी चन्द्र कुबेर खापुङले बताउनुभयो । पक्राउ पर्नेमा लमजुङ घर भई सामाखुसी बस्ने कमल बाबु भट्ट, भक्तपुर चाँगुनारायण बस्ने मधु सिलवाल र अरुण खड्का तथा शान्तिनगर बस्ने, मोरङका रेवतीरमण निरौला छन् । निरौलाको डेराबाट नक्कली शैक्षिक प्रमाणपत्र, सरकारी कार्यालयका छाप, झोला, लाइसेन्स, राहदानी लगाएतका सामाग्री बरामद गरिएको उहाँले जानकारी दिनुभयो ।

 

कमल बाबु भट्टलाई पक्राउ गरी थप सोधपुछ गर्दा अर्को क्रेटा गाडी भक्तपुर बस्ने अरुण खड्का, मधु सिलवाल र बिशाल खड्काको गुरुपले बिक्रि गर्न राखेको भन्ने कमल बाबु पुरीबाट उक्त गाडी खरिद गर्ने बाहाना बनाई सम्पर्क गर्न लगाउदा गाडी किनबेचको कुरा मिलाई भक्तपुरको सुर्यविनायक ६ गणेश मन्दिरबाट प्रदेश ३–०१०२४ च ०२५३ नम्वर प्लेटको सेतो क्रेटा कार र उक्त कारमा सवार अरुण खड्का, मधु सिलवाललाई पक्राउ गरिएको प्रहरीले जनाएको छ । दुवै सवारी दर्ता किताब कमल बाबु पुरीको नाममा रहेको छ । रेवती रमण निरौलाले यस्ता ब्लु बुक बनाईदिने गरेकाले उक्त नक्कली कागजातहरु विभिन्न सरकारी तथा गैर सरकारी कार्यालयहरुमा समेत दुरुपयोग भएको हुन सक्नेतर्फ थप अनुसन्धान भइरहेको अपराध महाशाखाले जनाएको छ ।

 

घटना विवरण:-
मिति २०७८।०३।१४ गते दिउँसो १५:०० बजेको समयमा भंसार छली चारपाङग्रे सवारी साधन काठमाण्डौ भित्र्याई बिक्री बितरण भइरहेको गोप्य सुचनाका आधारमा ग ३ च १४६२ र नम्बर प्लेट भएको Silver Color को हुण्डाई कम्पनीको क्रेटा कार का.जि.का.म.न.पा वडा नं. ७ गोपीकृष्ण हल नजिक फेलापारी उक्त कारमा सवार कमल बाबु पुरी भनिने कमल बाबु भट्टलाई पक्राउ गरी थप सोधपुछ गर्दा निजले अर्को क्रेटा गाडी भक्तपुर बस्ने अरुण खड्का, मधु सिलवाल र बिशाल खड्काको ग्रुपले बिक्रि गर्न राखेको भन्ने खुलाई दिएकोले कमल बाबु पुरीबाट उक्त गाडी खरिद गर्ने बाहाना बनाई सम्पर्क गर्न लगाउदा गाडी किनबेचको कुरा मिलाई भक्तपुर जिल्ला सुर्यविनायक न.पा वडा नं. ६ गणेश मन्दिर छेउबाट प्रदेश ३-०१०२४ च ०२५३ नम्वर प्लेटको सेतो क्रेटा कार र उक्त कारमा सवार अरुण खड्का, मधु सिलवाल समेतलाई पक्राउ गरिएको, दुबै सवारी दर्ता किताब निज अभियुक्त कमल बाबु पुरीको नाममा रहेको देखिएकोले सो सम्बन्धमा निजसंग सोधपुछ गर्दा रेवती रमण निरौलाले यस्ता ब्लुबुक बनाईदिने गरेको र निजसँग भएका ब्लुबुकहरु समेत निजले आजै बनाई दिएको, निजको सहयोगमा रेवती रमण निरौलालाई पशुपती मन्दिर परिसरबाट अं. २०: ३० बजेको समयमा प्रहरी टोलीले पक्राउ गरी निज बस्ने शान्तिनगर स्थित डेरा कोठा समेत खानतालासी गर्दा कोठाको स्टिलको दराजबाट बिभिन्न सरकारी कार्यालयका छाप, बिश्वबिद्यालयका छाप, यातायात ब्यबस्था कार्यालयका छाप लगायत जम्मा १९१ वटा स्टाम्प (छाप) लगायत बिभिन्न शैक्षिक संस्थाका प्रमाण पत्रहरु, सवारी चालक अनुमती पत्र लगायतका कागजातहरु प्रहरी टोलीले बरामद गरी ल्याएको। साथै बरामद भई आएका सवारी साधनको प्रचलित बजार मुल्य प्रति कार ७० लाख का दरले करिब १ करोड ४० लाख रुपैँया रहेकोमा निजहरुले प्रति कार ४५ लाखका दरले ९० लाखमा बिक्री गर्न लागि रहेको समेत खुल्न आएको र बरामद भएका शैक्षिक प्रमाण पत्रहरु, सरकारी छापहरु छपाई तथा निर्माण गर्ने संस्था एवं व्यक्ति बारे आवश्यक अनुसन्धान भईरहेको । साथै उक्त नक्कली कागजातहरु बिभिन्न सरकारी तथा गैर सरकारी कार्यालयहरुमा समेत दुरुपयोग भएको हुनसक्नेतर्फ समेत थप अनुसन्धान भईरहेको ।
पक्राउ परेका व्यक्तिहरुलाई मुलुकी अपराध संहिता २०७४ को परिच्छेद २५ को लिखत सम्बन्धी कसुरमा थप अनुसन्धानका लागि महानगरीय प्रहरी परिसर, टेकु काठमाण्डौमा पठाईएको र निजहरुले भन्सार छली सवारी साधन चोरी पैठारी गरि ल्याउने गरेको पाईएको हुँदा निजहरुलाई भन्सार ऐन, २०६४ अन्तर्गतको कसुरमा समेत अनुसन्धान भैरहेको ।
पक्राउ परेका व्यक्ति:-
१ नाम :- मधु शिलवाल
उमेर :- ४१ बर्ष
स्थायी वतन :- जिल्ला भक्तपुर चागुँनारायण न.पा वडा नं. २
२ नाम :- अरुण खड्का
उमेर :- २४ वर्ष
स्थायी वतन :- जिल्ला भक्तपुर सुर्यविनायक न.पा वडा नं. ८
३ नाम :- कमल बाबु पुरी भन्ने कमल बाबु भट्ट
उमेर :- ३३ वर्ष
स्थायी वतन :- जिल्ला लमजुङ सुन्दरबजार न.पा वडा नं. ३
४ नाम :- रेवती रमण निरौला
उमेर :- ४१ वर्ष
स्थायी वतन :- जिल्ला मोरङ कानेपोखरी गा.पा वडा नं. ७ ।
मिति :- २०७८/०३/१५ गते ।