२०७८ बैशाख ८ , बुधवार

रायमाझीलाई ओली सरकारमा दोस्रो पटक ऊर्जा मन्त्रालयको जिम्मेवारी

सुनाखरी न्युज
काठमाडौं । प्रधानमन्त्री केपी शर्मा ओलीले शुक्रबार साँझ गरेको मन्त्रीपरिषद् विस्तारमा ऊर्जा, जलस्रोत तथा सिँचाइ मन्त्रालयको जिम्मेवारी नेकपा नेता टोपबहादुर रायमाझीलाई दिइएको छ । उनी ओली नेतृत्वको सरकारमा दोस्रो पटक एउटै मन्त्रालयको जिम्मेवारी पाउने नेता भएका छन् ।

२०७२ सालमा ओली पहिलो पटक प्रधानमन्त्री हुँदा रायमाझीलाई उपप्रधान तथा ऊर्जा मन्त्रालयको जिम्मेवारी दिइएको थियो । उनी त्यतिबेला करिब ९ महिना मन्त्रालय चलाएका थिए । २०७२ कात्तिक २ गते मन्त्रालय प्रवेश गरेका रायमाझी २०७३ असार २९ गते बाहिरिएका थिए ।

पछिल्लो समय सत्ताधारी दल नेकपाभित्र देखिएको विभाजन र प्रधानमन्त्री ओलीले एकाएक प्रतिनिधिसभा विघटन गरेपछि ७ मन्त्रीले एकैपटक राजीनामा दिएका थिए । नेकपा प्रचण्ड–माधव नेपाल र ओली गुटमा प्रस्टसँग बाँडिएपछि निवर्तमान ऊर्जा, जलस्रोत तथा सिँचाइ मन्त्री वर्षमान पुनसहित ७ जना मन्त्रीहरूले राजीनामा दिएका थिए ।

तत्कालीन एमाओवादी र एमाले एकीकरण भएपछि बनेको कम्युनिष्टको एकल सरकारमा ओलीले पुनलाई २०७४ चैत २ गते ऊर्जा मन्त्री बनाएका थिए । उनले गत पुस ५ गते पदबाट राजीनामा दिएका थिए । ओली सरकारमा उनी करिब २ वर्ष ९ महिना ३ दिन मन्त्री बने ।