२०७७ चैत्र ३० , सोमवार

प्रहरी महानिरीक्षक थापाले गरे सुडान मिसन जाने प्रहरी टोलीको बिदाइ

सुनाखरी न्युज/ काठमाडौं – प्रहरी महानिरीक्षक शैलेश थापा क्षेत्रीले राष्ट्रसंघको शान्ति स्थापनार्थ सुडानको डार्फर जान लागेको प्रहरी टोलीलाई आज एक कार्यक्रमबीच बिदाइ गरेका छन्। शान्ति स्थापनार्थ फर्मड पुलिस युनिट एफपियु को रूपमा सुडानस्थित युनामिड मिसन १७औं समूहमा खटि जाने प्रहरी कर्मचारीहरूलाई प्रहरी प्रधान कार्यालयमा आयोजित एक कार्यक्रममा उनले बिदाइ गरेका हुन्।

 

बिदाइ कार्यक्रममा प्रहरी महानिरीक्षक थापा क्षेत्रीले उक्त समूहका कन्टिनजेन्ट कमाण्डर प्रहरी उपरीक्षक सुरेन्द्रप्रसाद मैनालीलाई नेपालको राष्ट्रिय झण्डा हस्तान्तरण गरेका थिए। मिसनमा छनौट भई प्रशिक्षण कार्यमा समेत सफल भएका समूहका सम्पूर्ण प्रहरी कर्मचारीहरूलाई उनले बधाइ तथा शुभकामना दिएका थिए। एफपीयू छनौट मापदण्डलाई हालै अद्यावधिक गरिएको र अद्यावधिक मापदण्ड प्रहरी कर्मचारीको वृत्ति विकासको निम्ति थप लाभदायक हुने विश्वास समेत उनले व्यक्त गरेका थिए।

 

संयुक्त राष्ट्रसंघीय मिसनमा खटिने प्रहरी कर्मचारी देश र संगठनको प्रतिनिधिको रुपमा रहने उल्लेख गर्दै प्रहरी महानिरीक्षक थापा क्षेत्रीले भने, “विदेशमा रहँदा तपाईं व्यक्ति र संगठन मात्र होइन, एउटा मुलुक पनि हो भन्ने कुरा तपाईंको आत्मामा रहनु पर्दछ।”समारोहमा मिसनसम्बन्धी प्रतिवेदन प्रस्तुत गर्दै प्रहरी प्रधान कार्यालय यूएन महाशाखाका प्रमुख प्रहरी वरिष्ठ उपरीक्षक वीरेन्द्रकुमार बस्यालले त्यसतर्फ खटि जाने समूहमा प्रहरी उपरीक्षक १, प्रहरी नायव उपरीक्षक ४, प्रहरी निरीक्षक ७, प्रहरी नायव निरीक्षक २४, प्रहरी सहायक निरीक्षक १७, प्रहरी हवल्दार ५५, प्रहरी जवान ६५ र प्रहरी कार्यालय सहयोगी ७ जना गरी जम्मा १८० जना रहेको जानकारी दिए।