२०८० चैत्र १५ , बिहिवार

नक्कली विल वनाएर नक्कली गरगहना विक्रीगर्ने गिरोह सक्रिय

सुनाखरी न्युज/ काठमाडौं ।
नक्कली विल वनाएर नक्कली गरगहना विक्री गर्ने गिरोह काठमाडौं उपत्यका लगायत मुलुकका विभिन्न शहरमा सक्रिय हुन थालेको पाइएको छ । उनीहरुले नक्कली पसलको नाम राखी ठगी गर्ने गरेको समेत पाइएको नेपाल सुनचाँदी ब्यवसायी महासंघका कार्यवाहक अध्यक्ष मोहन काजी शाक्यले बताउनुभयो । उहाँका अनुसार यस्तो गिरोहले नक्कली पसल खडागरी त्यसैको नाममा विल समेत वनाएर नक्कली गरगहनालाई सक्कली भन्दै विक्री वितरण गर्ने गरेको पाइएको हो ।
यसै सिलसिलामा ललितपुर सुनचाँदी ब्यवसायी संघको एक प्रतिनिधीमण्डलले बुधबार महासंघमा यस बिषयमा जानकारी गराउँदै यस्ता गविविधिवाट सतर्क रहन सम्पूर्ण सुनचाँदी ब्यवसायी तथा उपभोक्तालाई जानकारी गराउन आग्रह गरेको छ ।
नेपाल सुनचाँदी ब्यवसायी महासंघका महासचिव धर्मशुन्दर बज्राचार्यले अवैध धन्दामा सक्रिय गिरोहको बारेमा महासंघका जानकारी आएको बताउँदै यस्तो गिरोहवाट जोगिन आम ब्यवसायी तथा उपभोक्तारुलाई आग्रह गर्नुभयो ।
पछिल्लो समय यसरी नक्कली विल लगायतका कागजात वनाई नक्कली सुनको कारोबार गर्ने गिरोह सक्रिय छ । यस्तो गिरोहले ललिपुर सुनचाँदी ब्यवसायी संघको सदस्य रहेको भन्दै वनेपा लगायतका स्थानमा नक्कली गरगहना बिक्री गर्दै हिँडेको पाइएको छ ।