२०७९ श्रावण २८ , शनिवार

माघ मसान्तसम्म  शैक्षिक संस्था भौतिक उपस्थितिमा नगराउन सिफारिस

सुनाखरी न्युज/ काठमाडौं ।
कोभिड–१९ संकट व्यवस्थापन समन्वय केन्द्र (सिसिएमसी) ले शैक्षिक संस्थाहरू भौतिक उपस्थितिमा माघ मसान्तसम्म बन्द गर्न सिफारिस गरेको छ।

सिसिएमसीको  शुक्रबार बसेको बैठकले शिक्षक संस्थाहरू भौतिक रूपमा माघ मसान्तसम्म बन्द गर्न सिफारिस गरेको प्रवक्ता तथा सहसचिव सुनिता नेपालले जानकारी दिइन्।

उनले शिक्षण संस्थाहरूले वैकल्पिक माध्यमबाट पढाइ सञ्चालन गर्न भने सक्ने बताइन्। यसअघि कोरोनाको संक्रमण तीव्र गतिमा फैलिएपछि माघ १५ गतेसम्म हिउँद बिदाको रूपमा दिन भनेको थियो। तर अझै संक्रमण नियन्त्रणमा आइनसकेको हुँदा त्यसलाई लम्ब्याउन सिफारिस भएको हो।

‘हामीले शैक्षिक संस्थाहरू बन्द गर्न सिफारिस गरे पनि वैकल्पिक र अनलाइन माध्यमबाट पढाइ सञ्चालन गर्न भनेर सिफारिस गरेका छौं,’ उनले भनिन्।

यस्तै, कोरोना फैलिएपछि विश्वविद्यालयले सञ्चालन गरेका परीक्षाहरूमा पनि असर परेको थियो। विश्वविद्यालयले सञ्चालनमा रहेका परीक्षालाई स्थगित गरेको थियो। त्यसलाई पनि स्वास्थ्यका मापदण्डहरू पालना गरी सञ्चालन गर्न शिक्षा मन्त्रालयलाई सिफारिस भएको नेपालले बताइन्।

यसअघि सिफारिस गरिएका डान्स बार, सिनेमा हल, क्लब लगायतलाई माघ १५ गते गतेसम्म बन्द गरिएकोमा माघ मसान्तसम्म लम्ब्याउन सिफारिस गरिएको छ।

यस्तै,  यसैगरी सार्वजनिक यातायातको लागि जोर-बिजोर प्रणाली हटाउन सिफारिस भएको छ। निजी सवारी साधन र ट्याक्सीको हकमा भने जोर-बिजोर प्रणाली लागु नै गर्न सिफारिस भएको उनले बताइन्।